Kusali kimya kimya

Ikh-faat (Kiarabu: الإخفات) humaanisha kusoma kimya kimya nyiradi au dhikri za swala bila kunyanyua sauti. Dhikri hizo ni kama vile tasbihi nne maarufu za swala zisomwazo badala ya Surat al-Fatiha, Pia Surat al-Fatihah na Surah zisomwazo baada Surat al-Fatihah. Zote zinapaswa kusomwa polepole katika swala ya Adhuhuri na Alasiri. Pia ni Mustahabbu (ni jambo linalopendekezwa) kusali swala za sunna bila kunyanyua sauti katika kusoma nyiradi hizo. Inapendekezwa na inaruhusiwa katika za swala ya Aayat, ambazo husaliwa kutokana na kutokea hali maalumu ya taharuki za kupatwa kwa jua, mwezi na matetemeko ya ardhi.

Uchambuzi wa Dhana

Ikhfaat (kutodhihirisha) ni kinyume cha Jahr (kudhihirisha), maana yake ni kusoma polepole Katika vitabu vya fiqhi neno hili limezungumziwa katika suala la kusoma swala Mafakihi wengi wanaona kwamba kigezo makini cha Ikhfaat, ni kutodhihirisha kiini cha sauti. Na hukumu ya kusadiki kiwango cha sauti ambacho kitahesabiwa kuwa ni kiwango cha chini, hilo litabaki kwenye mikono na desturi za wanajamii.

Yanayopaswa Kutodhihirishwa Katika Swala

Katika hali zifuatazo, ni wajibu kuswali polepole:

1. Surat al-Fatihah na Sura isomwayo baada yake, katika swala ya Adhuhuri na Alasiri, isipokuwa swala ya Adhuhuri siku ya Ijumaa.
2. Tasabihatul Arba’a (tasbihi nne maarufu) zisomwazo katika rakaa mbili za mbili za mwisho za swala ya Adhuhuri na Alasiri, na katika rakaa ya tatu ya swala ya Magharibi, na katika rakaa mbili za swala ya Isha.
3. Dhikri na nyiradi zote za sala ya maaamuma anayesalishwa katika swala ya jamaa.
4. Swala ya mwanamke anayeswali mbele au katika eneo lenye watu, inapaswa kuswaliwa kimya, ikiwa sauti yake itakuwa inasikika na maharimu wake na kuhofiwa kuleta fitna.
5. Surat al-Fatihah katika swala ya ihtiaat (sala ya kuyakinisha).

Kwa mujibu wa fatwa za wanazuoni wengi, kuacha au kutochunga kuswali pole pole (kimya kimya) kwa makusudi, kunasababisha swala yako kuwa batili. Bila shaka, ikiwa umefanya hivyo kwa kusahau au kutojua, basi swala yako ni sahihi.

Ya Wajibu na Yanayojuzu Kutodhihirisha

Yafuatayo ni mustahabu (yaliopendekezwa) kutoyadhihirisha:

1. Swala za mustahabu ziswaliwazo mchana.
2. Isti'adha (Audhubillahi mina Shaitani Rajiim) isomwayo kabla ya Surat al-Fatihah.

Katika ibada zifuatazo, yajuzu mtu kutodhihirisha ndani ya swala yake:

1. Surat al-Fatiha katika swala ya Asubuhi, Magharibi na Isha kwa mwanamke. Mwanamke atakuwa na hiari ya kufanya hivyo, iwapo sauti yake itasikika na asiyekuwa maharimu wake.
2. Zikri au tasbihi mbali mbali za swala, ukiachana na Surat al-Fatihah na tasbihat Arbaa .
3. Swala ya Ayaat na Tawafu (swala iswaliwayo kutokana na taharuki maalumu, kama vile kupatwa kwa jua, mwezi na matetemeko ya ardhi).

Falsafa ya Kudhihirisha Swala na Kutodhihirisha

Kwa kulingana na hadithI iliyotajwa katika kitabu cha Ilalu Sharaai'i (Sababu za Sheria), ikizungumziwa juu ya sababu ya kuswali kwa jahr (kudhihirisha kwa sauti) na kuswali kwa ikhfaat (kusali kimya kimya) katika swala. Ni kwamba swala ya asubuhi, Magharibi na Isha zilikuwa zikiswaliwa gizani, kwa hivyo ziliswaliwa kwa sauti kubwa ili kuwatanabahisha wengine waelewe kuwa swala ya jamaa tayari inaswaliwa. Lakini kwa upande wa swala ya adhuhuri na alasiri, kwa vile zilikuwa zikiswaliwa mchana, na kila mmoja alikuwa akishuhudia kuswaliwa kwake., hivyo basi hakukuwa na haja ya kuziswali kwa sauti kubwa (jahr).